Amaravati News Navyandhra First Digital News Portal
Bangladesh Violence: బంగ్లాదేశ్‌లో పరిస్థితి అల్లకల్లోలంగా మారింది. దేశవ్యాప్తంగా జనం ఆగ్రహం కట్టలు తెంచుకోవడంతో రోడ్లపైకి వచ్చి నిరసనలు వ్యక్తం చేశారు. ఈ ఆందోళనల్లో 300 మందికిపైగా మృత్యువాత పడగా.. వందలాది మంది గాయాలతో ఆస్పత్రుల పాలయ్యారు. అయితే మొదట శాంతియుతంగా ప్రారంభమైన నిరసనలు.. ఆ తర్వాత మరింత ఉద్ధృతమై చివరికి హింసాత్మకంగా మారడంతో.. ఏకంగా ప్రధాని పీఠమే కదిలిపోయింది. ప్రధాని రాజీనామా చేయాలన్న డిమాండ్ రోజురోజుకూ పెరిగి.. ఏకంగా ప్రధాని నివాసాన్ని ఆందోళనకారులు చుట్టుముట్టడంతో.. షేక్ హసీనా రాజీనామా చేసి.. దేశం విడిచి పరారయ్యారు. అయితే ఈ నిరసనల వెనుక ఓ కోర్టు తీర్పు ఉండటం గమనార్హం.
బంగ్లాదేశ్‌లో విద్యార్థులు చేపట్టిన శాంతియుత నిరసన హింసాత్మకంగా మారింది. సివిల్ సర్వీసెస్ ఉద్యోగాల్లో కోటా రద్దు చేయాలన్న డిమాండ్‌తో గత నెలలో మొదలయ్యాయి. చివరకు ఈ నిరసనలు ప్రభుత్వ వ్యతిరేకంగా మారాయి. 1971 సంవత్సరంలో బంగ్లాదేశ్‌కు స్వాతంత్ర్యం వచ్చింది. ఈ క్రమంలోనే ఆ ఉద్యమంలో పోరాటం చేసిన స్వాతంత్ర్య సమరయోధుల కుటుంబాలకు ప్రభుత్వ ఉద్యోగాల్లో 30 శాతం రిజర్వేషన్లు కల్పిస్తూ 1972లో అప్పటి ప్రధాని, బంగ్లా జాతి పిత, షేక్ హసీనా తండ్రి షేక్ ముజిబుర్ రెహ్మాన్.. ఒక చట్టం తీసుకువచ్చారు. అయితే ఈ చట్టాన్ని 2018 లో తీవ్ర నిరసనలు వ్యక్తం కాగా.. అప్పుడు ప్రధానమంత్రిగా ఉన్న షేక్ హసీనా రద్దు చేస్తూ సంచలన నిర్ణయం తీసుకున్నారు. ఈ క్రమంలోనే షేక్ హసీనా తీసుకున్న ఆ రద్దు నిర్ణయాన్ని ఇటీవల హైకోర్టు కొట్టివేసింది. దీంతో మరోసారి బంగ్లావాసుల్లో తీవ్ర ఆగ్రహావేశాలు వ్యక్తం అయ్యాయి. అయితే ఈ హైకోర్టు తీర్పుపై స్టే విధిస్తూ సుప్రీంకోర్టు ఆదేశాలు జారీ చేసినా.. యువతలో ఆగ్రహం చల్లారలేదు.
రిజర్వేషన్లను రద్దు చేస్తూ షేక్ హసీనా ప్రభుత్వం తీసుకున్న నిర్ణయాన్ని వ్యతిరేకిస్తూ 1971లో మృతిచెందిన స్వాతంత్య్ర సమరయోధుల కుటుంబ సభ్యులు హైకోర్టుకు ఎక్కారు. ఆ పిటిష‌న్లను పరిగణలోకి తీసుకున్న హైకోర్టు.. ఈ ఏడాది జూన్‌లో ప్రభుత్వం తీసుకున్న నిర్ణయాన్ని కొట్టిపారేస్తూ సంచలన తీర్పు వెలువరించింది. దీంతో ఆ రిజర్వేషన్ల కోటా వ్యవ‌స్థ మ‌ళ్లీ అమల్లోకి వచ్చింది. కోర్టు కొత్త ఆదేశాల‌తో.. ప్రభుత్వ ఉద్యోగాల్లో 56 శాతం కోటా.. ప్రత్యేక గ్రూపుల‌కు రిజ‌ర్వ్ చేశారు. ఫ్రీడం ఫైట‌ర్ల మ‌న‌వ‌ళ్లు, మ‌న‌వ‌రాళ్లు, మ‌హిళ‌లకు రిజర్వేషన్లను పెంచారు. దీంతో బంగ్లాదేశ్‌లో నిరుద్యోగ యువ‌త ఆందోళ‌న‌కు దిగింది. ఫ్రీడం ఫైట‌ర్ల కుటుంబాల్లో మూడో తరానికి ఎందుకు రిజ‌ర్వేష‌న్ ఇస్తున్నార‌ని ఆవేదన వ్యక్తం చేశారు. ఆ యువ‌త ఇటీవల బంగ్లా వీధుల్లో నిరసన ప్రద‌ర్శన చేప‌ట్టారు. మెరిట్ ఆధారంగా పోస్టులు భర్తీ చేయాల‌ని డిమాండ్ చేశారు.
ఈ క్రమంలోనే దేశవ్యాప్తంగా తీవ్ర ఆందోళనలు వెల్లువెత్తుతుండటంతో బంగ్లాదేశ్ సుప్రీంకోర్టు వివాదాస్పద కోటా వ్యవ‌స్థను రద్దు చేసింది. ప్రభుత్వ ఉద్యోగాల్లో 93 శాతం మెరిట్ ఆధారంగా నియ‌మించాల‌ని.. మిగిలిన 7 శాతం మాత్రమే స్వాతంత్య్ర సమరయోధుల కుటుంబాలకు ఇవ్వాల‌ని తన ఆదేశాల్లో సుప్రీంకోర్టు పేర్కొంది. నిరసనలు చేప‌డుతున్న విద్యార్థి నేత‌లు.. దేశవ్యాప్తంగా స‌హాయ నిరాక‌ర‌ణ ఉద్యమానికి పిలుపునిచ్చారు. ప్రభుత్వానికి ప‌న్నులు క‌ట్టబోమ‌ని, బిల్లలు చెల్లించ‌బోమ‌ని తీవ్ర హెచ్చరికలు జారీ చేశారు.
అయితే షేక్ హసీనా ప్రాతినిథ్యం వహిస్తున్న అవామీ లీగ్‌ పార్టీతో సంబంధాలున్న వ్యక్తులకు మాత్రమే ఈ రిజర్వేషన్లతో ప్రయోజనం పొందుతున్నారని నిరసనకారులు ప్రధానంగా ఆరోపించారు. ఈ క్రమంలో షేక్ హసీనా ప్రభుత్వంపై ఆందోళన కారులు తీవ్ర అసంతృప్తి వ్యక్తం చేస్తూ రోడ్లపైకి వచ్చారు. మరోవైపు రిజర్వేషన్లపై సుప్రీంకోర్టు ఇచ్చిన తీర్పుపైనా నిరసనకారులు సంతృప్తి చెందలేదు. స్వాతంత్య్ర సమరయోధుల కుటుంబాలకు ప్రభుత్వ ఉద్యోగాల్లో రిజర్వేషన్లను పూర్తిగా రద్దు చేయాల్సిందేనని డిమాండ్ చేశారు. బంగ్లాదేశ్ మాజీ ఆర్మీ చీఫ్ ఇక్బాల్ కరీం కూడా ఆందోళనకారులపై.. షేక్ హసీనా ప్రభుత్వం తీసుకున్న చర్యలపై తీవ్రంగా మండిపడ్డారు.
మరోవైపు.. ప్రస్తుత బంగ్లాదేశ్ ఆర్మీ చీఫ్ వాకర్‌-ఉజ్‌-జమాన్‌.. ఆందోళన చేస్తున్న వారికి మద్దతు ఇవ్వడంతో దేశంలో అల్లర్లు మరింత పెరిగాయని విమర్శలు వెల్లువెత్తున్నాయి. అయితే బంగ్లాదేశ్‌లో తాజాగా జరిగిన హింసాత్మక ఘటనల వెనుక పాక్‌ సైన్యం, ఇంటెలిజెన్స్‌ ఏజెన్సీ, ఇంటర్‌ సర్వీసెస్ ఇంటెలిజెన్స్‌ – ఐఎస్ఐ ఉందా అనే అనుమానాలు తాజాగా వ్యక్తం అవుతున్నాయి. బంగ్లాదేశ్‌లోని ఛత్ర శివిర్‌ అనే విద్యార్థి సంస్థ ఈ హింసకు ప్రేరేపించినట్లు తెలుస్తోంది. అయితే ఛత్ర శివిర్‌ అనేద సంస్థ బంగ్లాదేశ్‌లోని నిషేధిత జమాత్‌ ఏ ఇస్లామీకి చెందిన ఒక శాఖ కావడం గమనార్హం. జమాతే ఇస్లామీకి పాకిస్థాన్‌కు చెందిన ఐఎస్ఐ మద్దతు ఉందని సమాచారం. దీంతో ప్రస్తుతం బంగ్లాదేశ్‌లో నెలకొన్న ప్రస్తుత పరిస్థితుల్లో ఐఎస్ఐ కూడా జోక్యం చేసుకుందా అనే అనుమానాలు వ్యక్తమవుతున్నాయి.
