హార్దిక్‌కు మరోషాక్..!

టీ20 ప్రపంచకప్ 2024లో ఛాంపియన్‌గా నిలివడం మినహా.. టీమిండియా స్టార్ ఆల్ రౌండర్ హార్దిక్ పాండ్యాకు గత ఏడాది కాలంగా ఏదీ కలిసి రావడం లేదు. ఆట పరంగా, వ్యక్తిగతంగా అతడు ఎన్నో కష్టాలు ఎదుర్కొంటున్నాడు. వాస్తవానికి గుజరాత్ టైటాన్స్ కెప్టెన్‌గా నియమితుడయ్యాక.. హార్దిక్ పాండ్యా ఫేట్ మారిపోయింది. తొలి సీజన్‌లోనే గుజరాత్ ఛాంపియన్‌గా నిలవడం.. రెండో సీజన్‌లోనూ ఫైనల్ చేరడంతో పాండ్యా కెప్టెన్సీపై ప్రశంసలు వచ్చాయి. భారత జట్టుకు సైతం భవిష్యత్ కెప్టెన్ అతడే అనే అభిప్రాయాలు వ్యక్తం అయ్యాయి.

కానీ ఐపీఎల్ 2024తో పరిస్థితులు పూర్తిగా మారిపోయాయి. గుజరాత్ టైటాన్స్ జట్టును వీడిన పాండ్యా.. ముంబై ఇండియన్స్ కెప్టెన్‌గా రోహిత్ శర్మ బదులు బాధ్యతలు చేపట్టాడు. ఇక అప్పటి నుంచి పాండ్యా డౌన్ ఫాల్ ప్రారంభమైంది. రోహిత్ శర్మ ఫ్యాన్స్‌తో పాటు ముంబై ఇండియన్స్ అభిమానులు సైతం హార్దిక్‌ను కెప్టెన్‌గా స్వీకరించలేకపోయారు. దీంతో అతడు హేళనకు గురయ్యాడు. రోహిత్ శర్మ, ఇషాన్ కిషన్, జస్‌ప్రీత్ బుమ్రా లాంటి ప్లేయర్లు ఉన్నప్పటికీ ముంబై ఇండియన్స్ పేలవ ప్రదర్శన చేసింది. దీంతో లీగ్ దశ నుంచే నిష్క్రమించింది.

అయితే టీ20 ప్రపంచకప్ 2024లో మాత్రం పాండ్యా అదరగొట్టాడు. రోహిత్ శర్మకు డిప్యూటీగా ఉన్న హార్దిక్.. ఆల్ రౌండర్ పాత్రను సమర్థవంతంగా పోషించాడు. ప్రపంచకప్ ఫైనల్‌ చివరి ఓవర్‌ను అద్భుతంగా వేసి జట్టుకు టైటిల్ అందించాడు. ట్రోఫీ గెలిచాక భారత్‌కు వచ్చిన అతడికి అపూర్వ స్వాగతం లభించింది. దీంతో విమర్శకుల నుంచి సైతం ప్రశంసలు అందుకున్నాడు. ఇక రోహిత్ శర్మ టీ20 లకు గుడ్ బై చెప్పడంతో టీమిండియా తదుపరి కెప్టెన్ అతడే అని అంతా డిసైడ్ అయిపోయారు.

అంతాసవ్యంగా సాగుతుందనుకున్న దశలో బీసీసీఐ పాండ్యాకు షాక్ ఇచ్చింది. అతడు జట్టులో ఉన్నప్పటికీ మిస్టర్ 360 సూర్యకుమార్ యాదవ్‌కు టీ20 సారథ్య బాధ్యతలు అప్పగించింది. కనీసం వైస్ కెప్టెన్‌గా కూడా పరిగణలోకి తీసుకోలేదు. దీనికి తోడు అతడి భార్య నటాషా నుంచి సైతం పాండ్యా విడిపోయాడు. ఈ విషయాన్ని ఇటీవలే అతడు ప్రకటించాడు. ఈ రెండు షాక్‌లు మర్చిపోకముందే.. హార్దిక్ పాండ్యాకు మరో ఎదురుదెబ్బ తగలనున్నట్లు తెలుస్తోంది. ఐపీఎల్ 2025 కోసం ముంబై ఇండియన్స్ జట్టు సైతం కెప్టెన్సీ నుంచి హార్దిక్‌ను తప్పించేయోచనలో ఉన్నట్లు తెలుస్తోది.

టీమిండియా తదుపరి కెప్టెన్‌ అవుతాడని భావించి రోహిత్‌ స్థానంలో హార్దిక్‌ను కెప్టెన్ చేసింది ముంబై. కానీ శ్రీలంకతో టీ20 సిరీస్ కోసం ఎంపిక చేసిన జట్టుకు సూర్యను కెప్టెన్‌గా ప్రకటించడంతో బీసీసీఐ ప్రణాళికల్లో హార్దిక్ సారథిగా లేడని ముంబై భావిస్తోంది. దీంతో హార్దిక్ బదులు సూర్యకుమార్ యాదవ్‌ను కెప్టెన్‌గా చేయాలని ముంబై ఇండియన్స్ భావిస్తోందని తెలుస్తోంది. అదే జరిగితే హార్దిక్‌కు మరో షాక్ తగిలినట్లే.