టీడీపీకి షాక్.. క్లీన్ స్వీప్ చేసిన వైసీపీ

కర్నూలు మున్సిపల్ కార్పొరేషన్ స్టాండింగ్ కమిటీ ఎన్నికల్లో వైసీపీ ఘన విజయం సాధించింది. స్టాండింగ్ కమిటీలో ఉన్న ఐదు స్థానాలకు గానూ ఐదింటినీ వైసీపీ క్లీన్ స్వీప్ చేసింది. మున్సిపల్ కార్పొరేషన్ స్టాండింగ్ కమిటీ ఎన్నికల్లో టీడీపీ విజయం కోసం మంత్రి టీజీ భరత్ చేసిన ప్రయత్నాలు ఫలించలేదు. మొత్తం ఐదు స్థానాలను వైసీపీ కైవసం చేసుకోవటంతో ఆ పార్టీ శ్రేణులు సంబరాలు చేసుకుంటున్నారు. ఫలితాల అనంత‌రం ఎస్వీ కాంప్లెక్స్ వ‌ద్ద ఉన్న వైయ‌స్ రాజ‌శేఖ‌ర‌రెడ్డి విగ్రహానికి మేయ‌ర్ బీవై రామ‌య్య, మాజీ ఎమ్మెల్యే ఎస్వీ మోహ‌న్‌రెడ్డి, వైసీపీ కార్పొరేట‌ర్లు, నాయ‌కులు పూల‌మాలలు వేసి నివాళుల‌ర్పించారు. మరోవైపు విజయవాడలో జరిగిన స్టాండింగ్ కమిటీ ఎన్నికల్లోనూ వైసీపీవే విజయం సాధించింది.

మరోవైపు చిత్తూరు నగరపాలక సంస్థ స్టాండింగ్ కమిటీ ఎన్నికల్లో టీడీపీ కూటమి విజయం సాధించింది. గురువారం జరిగిన ఎన్నికల్లో టీడీపీ సభ్యులు విజయం సాధించారు. చిత్తూరు మున్సిపల్ కార్పొరేషన్ స్టాండింగ్ కమిటీ ఎన్నికల్లో ఐదు స్థానాలకు టీడీపీ నుంచి ఐదుగురు, వైసీపీ నుంచి ముగ్గురు పోటీ చేశారు. అయితే టీడీపీ సభ్యులకే మెజారిటీ రావటంతో వారు గెలిచినట్లు ఎన్నికల అధికారులు ప్రకటించారు. అయితే నిబంధనల ప్రకారం ఎన్నికలు నిర్వహించలేదని వైసీపీ కార్పొరేటర్లు పోలింగ్ బహిష్కరించారు. ఇక స్టాండింగ్ కమిటీ ఎన్నికల్లో విజయం సాధించిన వారిని ఎమ్మెల్యే గురజాల జగన్మోహన్ అభినందించారు. ఎన్నికల్లో మద్దతుగా నిలిచిన వారికి ధన్యవాదాలు తెలియజేశారు.

మరోవైపు ఏపీ అసెంబ్లీ ఎన్నికల్లో గ్రాండ్ విక్టరీ కొట్టి అధికారంలోకి వచ్చిన టీడీపీ కూటమి.. స్థానిక సంస్థల్లోనూ బలం పెంచుకోవాలని భావిస్తోంది. ఈ క్రమంలోనే మున్సిపాలిటీలు, కార్పొరేషన్లలో వైసీపీ సభ్యులను తమ వైపు తిప్పుకోవాలనే ఆలోచనలో కూటమి నేతలు ఉన్నారు. ఇప్పటికే విశాఖపట్నంలో కొంతమంది వైసీపీ కార్పొరేటర్లు కూటమి గూటికి చేరిపోయారు. అయితే కార్పొరేటర్లను పార్టీల్లోకి చేర్చుకున్నా కూడా.. మేయర్, ఛైర్మన్ పీఠాలు దక్కవు. ఎందుకంటే మేయర్ లేదా మున్సిపల్ ఛైర్మన్ పదవుల్లో ఉన్నవారిపై నాలుగేళ్ల పాటు అవిశ్వాస తీర్మానం పెట్టకుండా వైసీపీ ప్రభుత్వంలో చట్టం చేశారు. ఈ నేపథ్యంలో ఈలోపే స్టాండింగ్ కమిటీలను చేజిక్కించుకోవాలని టీడీపీ కూటమి నేతలు ప్లాన్ చేస్తున్నారు.