ఏపీ ప్రజలకు తీపికబురు.. కొత్త రేషన్‌కార్డులు ఎప్పటి నుంచో క్లారిటీ వచ్చేసింది

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. వచ్చే ఏడాది జనవరికి నూతన సంవత్సర కానుకగా మరో హామీ అమలుకు సిద్ధమైంది. రాష్ట్రవ్యాప్తంగా అర్హత కలిగిన పేదలందరికీ కొత్త రేషన్‌ కార్డులు జారీ చేయాలని నిర్ణయించింది. కొత్తగా పెళ్లైన జంటలతో పాటుగా అర్హత ఉన్న ప్రతి పేద కుటుంబానికి రేషన్‌కార్డులు మంజూరు చేయనుంది. అంతేకాదు రాష్ట్రంలో ప్రస్తుతం ఉన్న రేషన్ కార్డులను రీ డిజైన్‌ చేసి.. పాత, కొత్త లబ్ధిదారులందరికీ కొత్త డిజైన్‌తో అందజేసేందుకు కసరత్తు చేస్తున్నారు అధికారులు. రాష్ట్రంలో అర్హులైన పేదలకు కొత్త రేషన్‌ కార్డులు మంజూరు చేసేందుకు పౌరసరఫరాలశాఖ కసరత్తు చేస్తోంది.

కొత్త కార్డులకు సంబంధించి డిజైన్లపై ఫోకస్ పెట్టారు అధికారులు.. ఆ కార్డులపై లేత పసుపు రంగు, రాష్ట్ర అధికారిక చిహ్నాన్ని ముద్రించిన డిజైన్‌ను ప్రభుత్వ ఆమోదం కోసం ప్రతిపాదించారు. రాష్ట్రంలో ప్రస్తుతం 1.48కోట్ల రేషన్‌కార్డులు ఉంటే.. వీటిలో 90 లక్షల కార్డుల్ని ఎన్ఎఫ్ఎస్ఏ (జాతీయ ఆహార భద్రత చట్టం) కింద కేంద్రం గుర్తించింది. ఈ కార్డులకు ఉచిత బియ్యం, కందిపప్పు, పంచదార వంటి సరుకులపై రాయితీ అందిస్తున్న సంగతి తెలిసిందే. అయితే మిగిలిన కార్డులకు ఉచిత బియ్యంతో పాటుగా కందిపప్పు, పంచదార, జొన్నలు, రాగులు వంటి సరుకులపై ఇస్తున్న సబ్సిడీకి సంబంధించిన ఆర్థిక భారం మొత్తం రాష్ట్ర ప్రభుత్వమే భరిస్తోంది.

రాష్ట్ర ప్రభుత్వం పీహెచ్‌హెచ్‌ (ప్రయారిటీ హౌస్‌హోల్డ్‌) రేషన్‌కార్డులను కూడా ఎన్ఎఫ్ఎస్ఏ పరిధిలోకి తీసుకోవాలని గతంలోనే కోరింది. కానీ కేంద్రం మాత్రం సానుకూలంగా నిర్ణయం తీసుకోలేదు.. ఏపీ ప్రభుత్వంపై ఆర్థికభారం పడకుండానే కొత్త రేషన్‌కార్డులు మంజూరు చేసేందుకు పౌరసరఫరాలశాఖ కసరత్తు చేస్తున్నారు. ప్రస్తుతం రాష్ట్రంలో ఉన్న మొత్తం రేషన్‌కార్డుల వినియోగంపై సమీక్షలు చేస్తున్నారు.. ఈ స్టార్టింగ్ డేటాను పరిశీలిస్తే ఆసక్తికర విషయాలు తెలిశాయి. ఇప్పటికే రాష్ట్రంలో గత ఆరు నెలలుగా.. 17,941 అంత్యోదయ అన్న యోజన (ఏఏవై), మరో 1,36,420 పీహెచ్‌హెచ్‌ కార్డుదారులు రేషన్‌ సరుకులు తీసుకోవడం లేదని గుర్తించారు.

ఈ కార్డులను తొలగిస్తే ఏడాదికి రూ.90 కోట్ల వరకు ఆదా అవుతుందని ప్రభుత్వం అంచనా వేస్తోంది. ఈ కార్డుల స్థానంలో అర్హులైనవారికి కొత్త కార్డులు మంజూరు చేయవచ్చని ఇప్పటికే ప్రభుత్వానికి పౌరసరఫరాలశాఖ ప్రతిపాదించింది. జనవరిలో 1.5 లక్షలకుపైగా పేద కుటుంబాలకు.. ప్రభుత్వంపై ఎలాంటి అదనపు భారమూ పడకుండానే కొత్త రేషన్‌కార్డులు మంజూరు చేసేందుకు పౌరసరఫరాలశాఖ సిద్ధమవుతోంది. ఈ మేరకు ప్రభుత్వ ఆమోదం రావాల్సి ఉంది. అంతేకాదు గత ప్రభుత్వం హయాంలో కొత్త రేషన్‌కార్డులు, అడ్రస్ మార్పు, తొలగింపు, కార్డుల్లో సభ్యుల చేర్పులు, స్ల్పిట్‌ కార్డులు, కార్డుల సరెండర్ కోసం చాలామంది దరఖాస్తు చేసుకోగా.. అవన్నీ పెండింగ్‌లో ఉన్నాయి.