అందరి చూపు సెప్టెంబర్ 17వైపే.. ఓవైపు నిమజ్జనం, మరోవైపు విమోచనం.. సర్వత్రా ఉత్కంఠ..!

ప్రస్తుతం తెలంగాణ ప్రజలందరి దృష్టి సెప్టెంబర్ 17 పైనే ఉంది. ఆరోజు హైదరాబాద్‌లో వాతావరణ పరిస్థితులపై సర్వత్రా ఉత్కంఠ నెలకొంది. ఓవైపు.. సెప్టెంబర్ 17వ తేదీనే హైదరాబాద్‌లో మహానిమజ్జన కార్యక్రమం జరగనుంది. ఖైరతాబాద్ మహా గణపతితో పాటు నగర వ్యాప్తంగా ఉన్న బడా గణేషులు మంగళవారం రోజునే హుస్సేన్ సాగర్‌లో నిమజ్జనం కానున్నాయి. కాగా.. సెప్టెంబర్ 17వ తేదీన తెలంగాణ విమోచన దినోత్సవం కూడా ఉండటంతో.. రాజకీయ కార్యక్రమాలు కూడా జోరుగా జరగనున్నాయి. రాష్ట్రంలోని ప్రధాన పార్టీలు ఈరోజున వివిధ రకాల కార్యక్రమాలు నిర్వహించనున్నాయి.

అయితే.. సెప్టెంబర్ 17న ప్రభుత్వపరంగా పబ్లిక్‌ గార్డెన్స్‌లో తెలంగాణ ప్రజాపాలన దినోత్సవం నిర్వహించనున్నారు. ఈ కార్యక్రమంలో సీఎం రేవంత్‌ రెడ్డి నేతృత్వంలోనే జరుగుతోంది. ఈ కార్యక్రమానికి కేంద్ర మంత్రులను కూడా సీఎం రేవంత్ రెడ్డి ఆహ్వానించటం గమనార్హం. మరోవైపు.. పరేడ్‌ గ్రౌండ్స్‌లో బీజేపీ ఆధ్వర్యంలో మరో కార్యక్రమం నిర్వహించనున్నారు. ఇక.. ఎంఐఎం ఆధ్వర్యంలో సౌత్‌ జోన్‌లో ర్యాలీ నిర్వహించనున్నారు. బీఆర్ఎస్ పార్టీ ఆధ్వర్యంలోనూ పలు కార్యక్రమాలు జరపనున్నారు. అయితే.. ఒకే రోజున మహానిమజ్జనంతో పాటు తెలంగాణ విమోచన దినోత్సాలు కూడా జరుగుతుండటంతో.. శాంతి భద్రతలకు ఎలాంటి ఇబ్బందులు రాకుండా పోలీసులు పకడ్బందీ ఏర్పాట్లు చేస్తున్నారు. దీంతో.. ఆరోజు ఎలాంటి పరిణామాలు జరగనున్నాయోనన్నది సర్వాత్ర ఉత్కంఠ నెలకొంది.

అయితే.. ఈనెల 17వ తేదీన నిమజ్జన ఏర్పాట్లపై హైదరాబాద్ సీపీ సీవీ ఆనంద్ సమీక్ష నిర్వహించారు. ఈ సందర్భంగా మాట్లాడిన సీవీ ఆనంద్.. ఖైరతాబాద్‌ మహాగణపతిని మధ్యాహ్నం ఒంటి గంటన్నరలోపే నిమజ్జనం చేయనున్నట్టు తెలిపారు. నిమజ్జనాల కోసం హైదరాబాద్‌లో రూట్స్‌ పరిశీలిస్తున్నట్టు చెప్పుకొచ్చారు. నిమజ్జనం సాఫీగా సాగేలా అన్ని శాఖల అధికారులు, హై లెవెల్ కమిటీ అంత సమన్వయంతో చర్యలు తీసుకుంటున్నట్టు తెలిపారు. అన్ని శాఖల అధికారుల సమన్వయంతో ముందుకు సాగుతున్నామని సీవీ ఆనంద్ తెలిపారు.

నిమజ్జనం రోజు (సెప్టెంబర్ 17న) 25 వేల మంది పోలీసులు బందోబస్తులో ఉంటారని సీవీ ఆనంద్ తెలిపారు. 15 వేల మంది సిటీ పోలీసులు, 10 వేల మంది పోలీసులు జిల్లాల నుంచి వస్తున్నారని తెలిపారు. హుస్సేన్ సాగర్ వైపు వస్తున్న ట్రై కమిషనరేట్ పరిధిలోని విగ్రహాలు.. ప్రశాంతంగా నిమజ్జనం అయ్యేలా అన్ని ఏర్పాట్లు చేస్తున్నామని తెలిపారు.

ఖైరతాబాద్ మహాగణపతి నిమజ్జనం మంగళవారం రోజున మధ్యాహ్నం 1.30లోపు అవుతుందని స్పష్టం చేశారు. మంగళవారం ఉదయం ఆరున్నర గంటలకే పూజలు అన్నీ పూర్తి చేసుకుని విగ్రహాన్ని తరలిస్తామని చెప్పుకొచ్చారు సీవీ ఆనంద్. ఇటు నిమజ్జన కార్యక్రమాలతో పాటుగా.. రాజకీయ కార్యక్రమాలకు కూడా పోలీసు భద్రతను కట్టుదిట్టం చేశామని వివరించారు. ప్రజలు, రాజకీయ పార్టీలంతా ఆ రోజున పోలీసులకు సహకరించాలని సీవీ ఆనంద్ కోరారు.