గాడిద పాల పేరుతో రైతులకు కుచ్చు టోపీ.. రూ.9 కోట్లు దోచేసిన ఏపీకి చెందిన సంస్థ

గాడిద పాల వ్యాపారం పేరుతో కర్ణాటక రైతులను ఆంధ్రప్రదేశ్‌కు చెందిన సంస్థ నిండా ముంచేసింది. మొత్తం 200 మంది సామాన్య రైతుల నుంచి ఏకంగా రూ.9 కోట్లు దండుకుంది. చివరకు ఇది బోగస్ అని తేలడంతో బాధిత రైతులు లబోదిబోమంటున్నారు. వివరాల్లోకి వెళ్తే.. అనంతపురం జిల్లాకు చెందిన నూతలపాటి మురళి.. మూడు నెలల కిందట ‘జెన్ని మిల్క్‌’ అనే పేరుతో ఓ సంస్థ ఏర్పాటుచేశాడు. హొసపేటెలోని హంపీ రోడ్డులో హంగూ ఆర్భాటాలతో దీనిని ప్రారంభించి.. ఉద్యోగులను నియమించుకున్నాడు. గాడిద పాల వ్యాపారం చేస్తే లక్షాధికారులు కావచ్చని ప్రచారం చేశాడు.

అయితే, ముందుగా తమ సంస్థకు రూ. 3 లక్షలు డిపాజిట్ చేస్తే.. మూడు గాడిదలను అందజేస్తామని చెప్పాడు. వాటిని పెంచి పోషించి పాలు పితికి ఇస్తే లీటరుకు రూ. 2,350 చెల్లిస్తామని నమ్మబలికాడు. ఇది నిజమేనని నమ్మిన దాదాపు 200 మంది రైతులు రూ. 3 లక్షల చొప్పున అతడికి సమర్పించుకున్నారు. వారికి రాజస్థాన్‌ తదితర ప్రాంతాల నుంచి తెప్పించిన గాడిదలను ఇవ్వడంతో మరో 100 మంది రైతులు రూ. 3 లక్షలు చెల్లించి పేర్లను నమోదు చేసుకున్నారు. ఎక్కడో తేడా కొడుతుందని అనుమానించిన తళవార్‌ నాగరాజ్‌ అనే రైతు జిల్లా అధికారులకు ఫిర్యాదు చేయడంతో బండారం బయటపడింది.

విజయనగర జిల్లా ప్లానింగ్ డైరెక్టర్ మనోహర్‌ నేతృత్వంలో అధికారులు విచారించడంతో వ్యాపార, ఇతర అనుమతులు లేవని వెల్లడయ్యింది. వ్యాపార అనుమతులు లేనందున సీజ్‌ చేశామని అధికారి మనోహర్‌ తెలిపారు. రూ.500 స్టాంప్ పేపర్లపై రైతులతో మూడేళ్లకు ఒప్పందం చేసుకున్నట్టు సంతకాలు చేయించుకున్నాడని చెప్పారు. మూడు ఆడ గాడిదలు, మూడు మగ గాడిదలను ఒక యూనిట్‌గా పేర్కొన్నాడని, చాలా మంది ఒకటి కంటే ఎక్కువ యూనిట్ల కోసం డబ్బులు చెల్లించినట్టు గుర్తించాని అన్నారు.

తొలుత ఒప్పందంలో చేరిన వారికి 20 రోజుల్లోనే గాడిదలను సరఫరా చేశారని వివరించారు. గాడిదలను అందజేసిన తర్వాత రైతుల నుంచి వాటి పాలను సంస్థ నేరుగా సేకరిస్తుందని ఒప్పందంలో రాసుకున్నారు. ‘మూడు గాడిదల నుంచి రోజుకు 1.5 లీటర్లు నుంచి 2 లీటర్ల పాలు ఉత్పత్తి అవుతాయని అంచనా.. ఒకవేళ, ఈ అంచనా కంటే ఎక్కువ పాలు వస్తే ఒప్పందాన్ని రద్దుచేసుకునే హక్కు సంస్థకు ఉంటుంది.. ఒకవేళ అంచనా కంటే తక్కువ పాలు ఉత్పత్తి అయితే గాడిదలను పది రోజుల్లోనే మారుస్తాం.. లీటరుకు రూ.2,350 చెల్లిస్తాం’ అని బాండు పేపర్‌లో రాసినట్టు గుర్తించారు.

గాడిద పాలు ఆరోగ్యానికి ఎంతో మేలు చేస్తాయని, ఎటువంటి రోగాన్నైనా నయం చేస్తాయని ముఖ్యంగా పిల్లలు, ఆస్థమా బాధితులకు ఔషధంగా ఉపయోగపడుతుందని రైతులకు చెప్పి ఒప్పించారు. అంతేకాదు, ఔషధాలు, సబ్బులు, క్రీములు సహా ఇతర వస్తువుల తయారీలోనూ ఈ పాలను వాడతారని నమ్మించారు. ఆదాయం దండిగా వస్తుందని నమ్మించి రైతుల నుంచి డబ్బులను వసూలు చేశారని విచారణలో తేలింది. వాస్తవానికి ఒక్కో గాడిద జత ధర రూ.20,000 నుచి రూ.30,000 వరకు ఉంటుంది. కానీ, వీళ్లు రూ.లక్ష చొప్పున లాగేశారు.