ట్రైనీ డాక్టర్‌ హత్యాచార ఘటనలో సుప్రీంకోర్టుకు సీబీఐ ఇచ్చిన రిపోర్ట్‌లో సంచలన విషయాలు

Kolkata Case: దేశవ్యాప్తంగా తీవ్ర సంచలనం సృష్టించిన పశ్చిమ బెంగాల్‌ ట్రైనీ డాక్టర్ హత్యాచారం కేసులో సీబీఐ దర్యాప్తు కొనసాగిస్తోంది. ఈ క్రమంలోనే తాజాగా కేసు విచారణకు సంబంధించిన పురోగతిపై సుప్రీంకోర్టుకు సీబీఐ రిపోర్ట్ సమర్పించింది. సుప్రీంకోర్టు ప్రధాన న్యాయూమూర్తి జస్టిస్ డీవై చంద్రచూడ్‌ నేతృత్వంలోని జస్టిస్‌ జేడీ పార్ధీవాలా, జస్టిస్ మనోజ్‌మిశ్రాతో కూడిన త్రిసభ్య ధర్మాసనం.. ఈ కేసును ఆగస్టు 20 వ తేదీన ఈ కేసును సుమోటోగా స్వీకరించింది. అనంతరం ఈ కేసుకు సంబందించి వాదనలు వింటుండగా.. దీనిపై స్టేటస్‌ రిపోర్టు అందించాలని సీబీఐకి ఆదేశాలు జారీ చేయగా.. నేడు సమర్పించింది. ఈ క్రమంలోనే ఈ ట్రైనీ డాక్టర్‌ రేప్, హత్య, అనంతరం అక్కడ చెలరేగిన విధ్వంస కాండపై మంగళవారం జరిగిన విచారణలో.. పశ్చిమ బెంగాల్‌ ప్రభుత్వ వైఖరిలోని పలు లోపాలను సుప్రీంకోర్టు తీవ్రంగా తప్పుపట్టింది. ఈ క్రమంలోనే పశ్చిమ బెంగాల్ ప్రభుత్వం కూడా నేడు స్టేటస్‌ రిపోర్టు కోర్టుకు సమర్పించనుంది.

సుప్రీంకోర్టుకు సీల్డ్ కవరులో సీబీఐ తన నివేదికను దాఖలు చేసింది. ఇందులో ముఖ్యంగా కోల్‌కతా పోలీసుల నిర్లక్ష్యాన్ని సీబీఐ ప్రస్తావించింది. ఇక ఈ కేసులో అనుమానం వచ్చి సీబీఐ విచారణ జరిపిన వారి వివరాలను కూడా ఈ స్టేటస్ రిపోర్టులో పేర్కొన్నారు. ఇక సంఘటనాస్థలానికి భద్రత లేదని.. సీబీఐ పేర్కొంది. సీబీఐతో పాటు కోల్‌కతా పోలీసులు కూడా ఈ కేసు స్టేటస్ రిపోర్టును సుప్రీంకోర్టులో దాఖలు చేశారు. కోల్‌కతాలో ఉన్న సీబీఐ అదనపు డైరెక్టర్, డీఎస్పీ నేతృత్వంలో ఈ రిపోర్ట్‌ను సిద్ధం చేశారు.

ఇక గత 6 రోజులుగా ఈ కేసులో ప్రధాన నిందితుడిగా ఉన్న సంజయ్ రాయ్, మరో నిందితుడు ఆర్‌జీ కర్ మెడికల్ కాలేజీ మాజీ ప్రిన్సిపాల్ సందీప్ ఘోష్‌లను సీబీఐ అధికారులు సుదీర్ఘంగా విచారణ జరిపారు. ఆస్పత్రికి వెళ్లి సీబీఐ అధికారులు అన్ని ఫోరెన్సిక్‌ విచారణలు జరిపి ఆధారాలు సేకరించే ప్రయత్నాలు చేశారు. ఇక సీబీఐ ఫోరెన్సిక్ బృందంలోని ఐదుగురు డాక్టర్లు సంజయ్ రాయ్‌ మానసిక స్థితిని తెలుసుకునేందుకు ప్రయత్నించారు. దానిపై ఒక నివేదికను కూడా తయారు చేశారు. సంజయ్‌ రాయ్‌ ఇచ్చిన వాంగ్మూలాలను నమ్మొచ్చో లేదో అని నిర్ధారించేందుకు ఈ పరీక్షను నిర్వహించినట్లు తెలుస్తోంది.

ఇక ఈ హత్యాచారంలో సంజయ్ రాయ్ ఒక్కడి ప్రమేయం ఉందా లేక ఇంకా అంతకన్నా ఎక్కువ మంది నిందితులు ఉన్నారా అనే కోణంలోనూ సీబీఐ అధికారులు దర్యాప్తు చేశారు. ఘటనకు ముందు, తర్వాత నిందితుడు సంజయ్‌ రాయ్‌ కదలికలను ఆస్పత్రిలోని సీసీటీవీ ఫుటేజీలో గుర్తించి వాటి ఆధారంగా నివేదికను రూపొందించారు. ట్రైనీ డాక్టర్‌పై హత్య తర్వాత సంఘటనా స్థలంలోకి చాలా మంది రావడంతో అక్కడ చాలా పాదముద్రలు కనిపించాయి.

మరోవైపు.. ప్రముఖ న్యాయవాది కపిల్‌ సిబల్‌ నేతృత్వంలోని 21 మంది లాయర్ల బృందం సుప్రీంకోర్టులో పశ్చిమ బెంగాల్‌కు ప్రాతినిధ్యం వహిస్తుండగా.. సొలిసిటర్‌ జనరల్‌ తుషార్‌ మెహతా ఆధ్వర్యంలోని ఐదుగురు లాయర్ల బృందం కేంద్ర ప్రభుత్వం తరఫున వాదనలు వినిపిస్తోంది. ఇక ఈ కేసులో మంగళవారం జరిగిన విచారణ సందర్భంగా ఆర్‌జీ కర్‌ మెడికల్‌ కాలేజీ ప్రిన్సిపల్‌ తీరుపై సుప్రీంకోర్టు తీవ్ర ఆగ్రహం వ్యక్తం చేసింది. అంత ఘోరం జరిగితే.. ఆత్మహత్య అని ఎలా చెప్పారంటూ మండిపడింది. ఇదే సమయంలో కొన్ని మీడియా సంస్థలు బాధితురాలి ఫొటో చూపించడం, పేరును ప్రస్తావించడంపైనా సుప్రీంకోర్టు సీరియస్ అయింది.

ఇక కేసు విచారణ సందర్భంగా పశ్చిమ బెంగాల్‌ ప్రభుత్వం, కోల్‌కతా పోలీసులు, మెడికల్‌ కాలేజీ అధికారుల తీరుపైనా సుప్రీంకోర్టు తీవ్ర అసహనం వ్యక్తం చేసింది. ఈ ఘటన జరిగిన తర్వాత నేరాన్ని ఉదయాన్నే గుర్తించినట్లు తెలిసింది. కానీ మెడికల్‌ కాలేజీ ప్రిన్సిపల్‌ మాత్రం దీన్ని ఆత్మహత్య కేసుగా చిత్రీకరించే ప్రయత్నం చేశారని.. పైగా ఎఫ్‌ఐఆర్‌ నమోదు చేయడం కూడా చాలా ఆలస్యం అయిందని తెలిపింది. మధ్యాహ్నం 1.45 గంటల నుంచి సాయంత్రం 4 గంటల మధ్య పోస్ట్ మార్టం పూర్తయినా.. , మృతదేహాన్ని అంత్యక్రియలకు అప్పగించిన 3 గంటల తర్వాత అంటే రాత్రి 11.45 గంటలకు ఎందుకు ఎఫ్ఐఆర్ నమోదు చేయాల్సివచ్చిందని ప్రశ్నించింది. అధికారులు, పోలీసులు ఏం చేస్తున్నారని సీజేఐ జస్టిస్‌ డీవై చంద్రచూడ్‌ నేతృత్వంలోని ధర్మాసనం నిలదీసింది.